WAKIL TUAN RUMAH (Pabmagyaharja)

Assalamualaikum wr.wb.

Nuwun,

            Para pinisepuh tuwin para sesepuh ingkang dahat pinundhi-pundhi ingkang kinurmatan.

            Para priyagung kakung miwah putri ingkang satuhu pantes sinudharsana ingkang kula hormati.

            Para rawuh ingkang minulya

            Nuhoni pamundhutipun Bapak saha ibu Dipta Yudhistira dalah besan Bapa saha ibu Adip Pandu Dhewanata, ingkang ing dinten punika amengku karya nindhakaken darmaning ngesepuh, awiwaha putra panjaja putri ingkang asesilih Roro Dhea kaliyan Bagus Nara, kula kadhawuhan matur wonten ing ngarsanipun panjenengan sedaya.

            Minangka purwakaning atur, sumangga sami sesarengan ngunjukaken puja pudyastuti syukur konjuk ing ngarsanipun Gusti Allah Ingkang Murbeng Dumadi, ingkang sampun paring kasugengan dhumateng kita sedaya, saha kepareng paring nugraha dhumateng Bapa saha Ibu Adip Pandhu Dhewanata dalah Bapa saha Ibu Dipta Yudhistira, punapa dene gotrah kagungan karsa ndhaupaken putra penganten sampun saged kalampahan wilujeng nir ing sambekala. Kajawi nughrahaning Gusti, sedayanipun punika inggih awit berkah pangestu panjenengan sedaya.

            Ingkang sami bebesan dalah kulawarga, ngaturaken pambagya wilujeng, sinartan tanpa pepindhan, dene panjenengan sampun kepareng angestreni pahargyan punika, saperlu paring berkah pangestu wilujeng dhumateng penganten kekalih.

            Ingkang sami amengku karsa miwah gotrah ugi ngaturaken panuwun ingkang tanpa upami, dene panjenengan sampun kepareng paring tandha tresna ingkang awujud punapa kemawon. Punika sedaya sayektos adamel mongkog sarta bombonging panggalih. Inggih awit saking punika, panjenengan sami mboten saged amahyakaken punapa-punapa, kajawi amung sumangga ing purba wasesanipun Gusti Ingkang Maha Kuwaos. Mugi-mugi kasaenan panjenengan kasebat antuk ganjaran ingkang samesthinipun.

            Para rawuh ingkang minulya.

            Minangka sesulihipun, kula suwunaken tambahing berkah pangestu panjenengan, kagem penganten, anggenipun jejodhoan sageda atut runtut rerentengan, widada lestari mulya, winantu ing rahayu.

            Minangka wasananing atur, brayat Roro kaliyan Bagus, boten kesupen nyuwun lumunturing pangaksama tumrap sedaya ceweting aruh, lungguh, suguh, sarta rengkuh, ingkang katur panjenengan. Ewa semanten mawantu-wantu panyuwunipun, keparenga panjenengan anyekakaken lenggah sinambi angresepi atur pasugatan sawonten-wontenipun.

            Wondene manawi wonten kirang wijang wijiling wicara, kula pribadi nyadhong gunging pangapunten.

Nuwun,

            Wassalamualaikum, wr.wb

Sumber Referensi :
Tuntunan Kagem Para PRANATACARA tuwin PAMEDHAR SABDA sinartan tuladha-tuladha Medhar Sabda, Ulem, Panyandra karya Rama Sudi Yatmana, penerbit Aneka Ilmu : Semarang.